سفاري (عالم البحار - 1)

بص يا سيدي: صيد السمك ده حواراته كتيرة، والرغي فيه مالهوش آخر، اللي يقولك: الصيد إدمان! واللي يقولك: الصيد ده تصفية بال وتهوية دماغ! بُص: دور بلايستيشن هيهوِّي دماغك أسرع، لكن "أجْعَص" (مشتقة من مجعلص) حاجة هتسمعها: الصيد صبر! وغالبًا هتسمعها من عمك أو خالك اللي ليه في الصيد بس أكيد مش من جيلنا...

يا صديقي، الصيد ده رياضة وهواية وتخيُّل وابتكار ومغامرة أحيانًا وأكشن أحيانًا أخرى... يا سلام على أحلى أكشن هتعمله لو بهارة ولا بركودا محمِّلة ضربتْ معاك، وبرضه أحيانًا بيبقى"ترجيع"! إيه! أيْوَن؛ دوار البحر اللي جه لأي حد فينا أول مرة يركب مراكب... متحطش في بالك.

بقولك إيه: متقلقش بقى أنت لسه حاطط في بالك؟! طيب أنا هجيب رجليك... فيه ظاهرة عجيبة اسمها (حظ المبتدئين) في رِحلات الصيد أحيانًا كثيرة بيبقى معانا واحد مُبتَدِئ، والكل بقى عايز يعمل عليه قُرصان أعالي البحار، والطيبين مننا بيبقوا عايزين يكسبوا لقب (المُعلِّم) في المثل الياباني "علمني كيف اصطاد علشان السوشي غالي"، وتلاقي صاحبنا المبتدئ أول مرة يمسك سنارة وبيلوِّش بيها فاكرها مضرب تنس، ومع ذلك ابن الذين تطلع معاه أكبر سمكة في الرحلة!

أفكرك شوية بالجغرافيا، ربنا أنعم على بلدنا ببحرين المتوسط والأحمر، وبنيل عظيم يشقُّ مصر من جنوبها لشمالها، وبالعديد من البحيرات الكبيرة (قارون، والبرلس، والبردويل...) كل دول ونصف الشعب مش لاقي شَربة مية نظيفة! يادي الهباب! مش عارف ليه بتحدف معايا بسياسة كده دايمًا؟

خلينا في الصيد...
الصيد نوعان: الأول صيد شَط، والثاني صيد بمركب داخل البحر، طبعًا فيه صيد في النيل بس مش سِكِّتي، ومش هعرف أعمل عليكم في النيل قرصان علشان ليه ناسه، لكن خلينا مع بعض في سكة البحر، كنت أسمع زمان يقولك كانوا بيجيبوا سمك أحجام وأشكال ياما، بس ده كان زمان وإن كنت لحقتلي يومين من بتوع زمان دول، لكن أنا هركز معاكم في موضوع الصيد بواسطة مركب داخل البحر، ومايمنعش لو غاوي شط تبقى تروح مع عمو وخالو وتقول وراهم عشر مرات "الصيد صبر، الصيد صبر"! وربنا كريم، متنساش الشمسية! إنت عمال تضحك؟! والله دي حاجة تحسَّر؛ لأن شواطئنا أصبحت فقيرة بالحياة البحرية والنظام البيئي السليم بسبب التلوث، والصيد الجائر والممنوع، والفساد المتعمَّد والتدمير للشعب وتجريف التربة البحرية...
بقولك إيه يا صديقي: إبقى اتفرج على ناشيونال جيوجرافيك، علشان رئيس التحرير قالي متطولش في الكلام وأنا عايز أقولك حاجات كتيرة!

بص بقى علشان متتفسحش وتعمل رحلة صيد صح لازم تبقى واخد بالأسباب صح الصح، يعني السمك ده مش موجود في كل مكان كده في البحر، زي ما فيه على الأرض أماكن صحراوية جرداء لا زرع فيها ولا ماء، البحر كده برضوا بس بدل الرملة ماء! والبحر كذلك مش أي وقت تطلعه، يعني ابعد عن (شهر مارس وأول إبريل) وابعد عن أيام النوَّات المعروفة في شهر 11 و12، وتابع مواسم هجرات السمك وأوقات ظهوره، مثلًا الشعور والكوشر والنواجل صيفًا، وكذلك المرجان والتونة والدراك شتاءً، المنطقة اللي هتطلع منها والمركب اللي هتطلع عليها؛ يعني فيه أماكن معروف إن معظم مراكبها للفسحة زي العين السخنة، وإن كان فيه كام مركب للصيد هناك، ونفس الكلام عن الغردقة فيها سمك كويس جدًّا، بس اختيار مركب وريس مركب بيفهم في الصيد، وده من أهم عناصر إنجاح رحلة صيد، وبالطبع هناك أماكن معروف أنها أماكن مراكبها كلها للصيد زي الكونيسة -قبل شرم الشيخ بخمسين كيلو- وحماطة بجنوب البحر الأحمر، وكذلك رأس العش والجمشة، ورأس غارب، كل تلك المناطق بالنسبة للبحر الأحمر، وكذلك مراكب أبو قير وميامي وبحري في مدينة الإسكندرية كبحر متوسط.

طبعًا أول حاجة هتيجي في بالك العدَّة، والعدة الكلام فيها هيطول شرحه، وهخصص للعدة الكلام في العدد القادم مع ذكر أنواع الصيد المختلفة (تسقيط، جَر، جيجنج، بوبنج...)، لكن أقدر أقولك إنك ممكن تستغنى عن أي حاجة في العدة بل والعدة كلها طالما معاك (حدَّاف وسن ورصاصة)! إيه؟!

الحدَّاف: دي بكرة خيط بس قطرها كبير شوية، بيبقى عليها خيط حسب المقاس اللي هتصطاد بيه (سمك الخيط من 40- 180 ملم حسب السَمَك المستهدف).
والسن: هو السنار أو "الهوك" اللي بيلكع في فم السمكة، وبالطبع السنون مقاسات وأشكال وأنواع كتيرة مختلفة، لكن أبسَّط لك الموضوع: السن البلدي -شكل حرف ل- وبحلقة من فوق لتسهيل ربطه بالخيط.

والرصاصة: هي ثقل أو وزن بيُصنَع من الرصاص لكثافته العالية؛ علشان ياخد السن بالطُعم وينزل به للمستوى المطلوب، وبتوضع الرصاصة أعلى السن أو أسفل السن حسب التكنيك المتبع.

دول لا غنى عنهم في عدة الصياد. طبعًا بعد كده تأتي "بوصة" الصيد أو الفايبر، وبيركب عليها مكنة الصيد، والاتنين مع بعض بيشكِّلوا السنارة، ودول أنواع وأشكال وأحجام حَسَب طرق الصيد المختلفة.
طبعًا يا صاحبي مفيش صيد من غير طُعم، والطُعم نوعان رئيسيان (طُعم حيّ وطُعم كذاب).

الطُعم الحي: هو ما تأكله السمكة في بيئتها الطبيعية (أسماك أخرى ميتة أو حية توضع كاملة في السن، أو تقطَّع لقطع صغيرة مثل الماكريل والبلاميطة والسردين، قطع من السبيط أو الكليماري، جمبري صغير، المحاريات، الديدان البحرية...).

الطُعم الكذاب: هو شكل يُصنَع من المعدن أو البلاستيك أو اللدائن أو حتى الخشب بحيث يكون على شكل سمكة، أو دودة، أو جمبري، أو أي شيء ملفت وجذاب للسمك.
اللي فات ده كله كوم، يعني آديك بتاخد بالأسباب، والكلمتين دول كوم؛ من الآخر: "الصيد رزق".

1 تعليق

  • انغام عبد الحليم محمد

    ماشاء الله رائع افادكم الله انا عندى موهبه الكتابه والشعر والخواطر ونفسى اتدرب واكتب معاكم فى ممكن ممكن

    تبليغ
    أرفق انغام عبد الحليم محمد الجمعة، 26 شباط/فبراير 2016 10:25 تعليق

رأيك في الموضوع

تأكد من ادخال المعلومات في المناطق المشار إليها ب(*) . علامات HTML غير مسموحة

عد إلى الأعلى

تابعونا