عريس Perfect - العدد 5

مش هانسى يوم ما كنت مع صاحبتي، وهي بتسأل أحد الشيوخ: يا شيخنا ادعيلي... وكانت بتحكي له بعض المشاكل اللي بتتعرض لها. فالشيخ بعد ما سمع لها، بدأ يقولها كلام يطمن قلبها ويصبرها، وهي قاعدة بتسمع في حالة هدوء تام. لحد ما جه عند سيرة الجواز، وقال لها: يا بنتي، بإذن الله نصيبك موجود واصبري. فقاطعته بسرعة رهيبة، يا شيخنا وهو طالما موجود؛ مجاش كل ده ليييييه؟؟! طبعا أنا فطست من الضحك؛ لأن وشها كان متعصب، وفي نفس الوقت بتضحك وهي بتقولُّه. مرت الأيام، وبدأت العرسان تتوالى على صحبتي، وبعد ما كان كل كلامها: يا رب يبقى ابن حلال وطيب. بدأت فجأة تظهر علامات "الهسهسة" غير الطبيعية، واللي بتصيب كل بنت في الحالة دي. تفتكري هو طيب؟! ولا عامل نفسه طيب؟! طيب لو مطلعش حنين؟! طيب أنا إيه يضمن لي إنه مش هيفضّل أمُّه عليَّ؟! هو عامل فيها رومانسي، وبعد الجواز مش هشوف حاجة من الرومانسية دي!! وبعدين دخلنا عصر التجرِبة والمواقف اللي تظهر حقيقة الراجل، فلقيتها كل شوية تيجي لي بشك جديد، وتقولي: هو طلع طيب، بس شكله عصبي، لا... طلع مش عصبي بس شكله كتوم!! وبعدين فجأة مبقاش لا عصبي ولا كتوم... بس احتمال يكون بيسرح كتير، أو بيحلم بكوابيس، أو بيفكَّر في حاجة هي مش فاهماها، طب يا ترى بعد الجواز هيبقى عامل إزاي؟ وبقى كل كلامها عبارة عن تخوُّفات مش منطقية، بس غصب عنها، بقت غالبة على فكرها أغلب الوقت، وفي الآخر طلعنا بنظرية جديدة خاااااالص، طب يا رب، يا رب، يا رب، يرفضني وهو اللي يبوظ الموضوع علشان مضطرش أنا أفكر إذا كان مناسب ولا لأ... وتبقى جات منه!! كل ده نتيجة التخوفات اللي بتيجي لكل بنت، وطبيعي وقت ما بتكون مستنية العريس، غير خالص أما بيجي فعلا، وتبدأ مرحلة التفكير الفعلي والاختيار الجاد؛ لأن البنت بطبيعتها - حسب الدراسات العلمية - بتحتاج للشعور بالأمان والاستقرار عكس الولد اللي بيحب الحرية والترفيه. فدايمًا البنت هتبقى قلقانة من كل ما يُعَرِّض أمانها أو شُعورها بالاستقرار للقلق أو الخطر... فـتلاقيها دايمًا بتتقلب ما بين سبعة أحاسيس وتنتقل بينهم أغلب الوقت؛ وهم كالتالي: الفضول، المتعة، التردد، العاطفة الجارفة، عدم الثقة، الحماس، الإنجاز. هتحسيهم إنتي كمان سواء الراجل اللي متقدم لك ده سيئ جدًّا أو كويس جدًّا... فمش مطلوب منك إلا: 1- إنك تدي نفسك فرصة بجد؛ علشان تفكري بهدووووووء، وتقرري صح. وافهمي شخصيتك علشان تعرفي مين الشخصية اللي تقدر تريَّحك بشكل أكتر (ودي هنتكلم عنها المرة الجاية بالتفصيل بإذن الله). 2- صلاة الاستخارة بشكل مستمر. 3- فهم وتدبر اسم الله الوكيل. 4- القراءة وحضور كورسات أو مجالس عِلْم حول فقه الزواج. وربنا يتمم بخير بإذن الله.

2 تعليقات

  • Hiba Samir

    بإذن الله نشتغل على فهم شخصيتنا في مقالة قريبة.. دعواتكم بالفتح :)

    تبليغ
    أرفق Hiba Samir الجمعة، 02 أيار 2014 15:34 تعليق
  • is

    السلام عليكم
    جزاكم الله خيرا
    التوصيات الاخيره
    - وافهمي شخصيتك علشان تعرفي مين الشخصية اللي تقدر تريَّحك بشكل أكتر (ودي هنتكلم عنها المرة الجاية بالتفصيل بإذن الله).
    في انتظار الموضوع جدا؟؟؟؟؟؟؟كيف افهم شخصيتي؟؟؟؟؟؟؟

    تبليغ
    أرفق is الإثنين، 28 نيسان/أبريل 2014 11:25 تعليق

رأيك في الموضوع

تأكد من ادخال المعلومات في المناطق المشار إليها ب(*) . علامات HTML غير مسموحة

عد إلى الأعلى

تابعونا